Қозоғистон Президенти АҚШ Конгресси Вакиллар палатаси
делегациясини қабул қилди. Давлат раҳбари муҳтарам меҳмонларни қутлар экан, уларнинг бир палатали Қурултойга сайловдан кейин қилган ташрифи рамзий
маънога эгалигини таъкидлади. Қосим-Жўмарт Тўқаев ушбу тарихий воқеа мамлакатда сиёсий
модернизациянинг янги босқичини бошлаб берганини тилга олди. Бир палатали Қурултой
қонунчилик жараёнини янада самарали қилади, қонунлар сифатини оширади. Шу билан бирга, парламент дипломатияси янги орган учун муҳим фаолият
йўналишига айланади. АҚШ Конгресси аъзолари ва Қурултой ўртасидаги конструктив
ва мазмунли мулоқот Қозоғистон - Америка ҳамкорлигини чуқурлаштиришда муҳим
аҳамиятга эга. Қосим-Жўмарт Тўқаев, шунингдек, Майамига бўлажак ташрифи
ҳамкорликка қўшимча туртки беришига ишонч билдирди.
Қосим-Жўмарт Тўқаев, Қозоғистон Республикаси Президенти:
- Ҳамкорлигимиз кенг қамровли, кенг кўламли масалалар, шу жумладан, сиёсий мулоқот, иқтисодий ҳамкорлик, глобал тинчлик ва хавфсизлик масалалари бўйича ҳамкорликни ўз ичига олади. Мен Қозоғистон - Америка ҳамкорлигини янада мустаҳкамлашда Конгрессдаги икки партия кўрсатаётган ёрдамни юксак баҳолайман, бу стратегик ҳамкорлигимизнинг давомийлигини таъминлашда муҳим аҳамиятга эга.
Қосим-Жўмарт Тўқаев Президент Дональд Трамп билан конструктив ва ўзаро ишончга
асосланган мулоқот туфайли икки давлат ўртасидаги
муносабатлар мисли кўрилмаган юқори даражага кўтарилганини таъкидлади. Мамлакатлар
кўп томонлама форматда самарали ҳамкорлик қилмоқда. Қозоғистон Американинг
глобал ва минтақавий барқарорликни таъминлаш бўйича ташаббусларини, шу жумладан,
Тинчлик кенгаши ва Иброҳим битимларини қўллаб-қувватлаётгани бунинг ёрқин далили бўла олади. Мамлакатимиз ва АҚШ ядровий хавфсизлик ва ядро қуролини
тарқатмаслик тартибини мустаҳкамлашда ҳам муҳим ўрин тутади. АҚШ делегацияси раҳбари Жейсон Смит Қосим-Жўмарт Тўқаевга
қабул учун миннатдорчилик билдирди ва АҚШ Президентининг саломини етказди.
Жейсон Смит, АҚШ Вакиллар палатасининг Бюджет ва солиқлар бўйича қўмита раиси:
- Бугун тунги соат иккида менга президент Доналд Трамп қўнғироқ қилди. Бир неча соатдан кейин сиз билан учрашишимни айтдим. У Сизга энг самимий тилакларини етказишимни сўради, ўртамизда қарор топган конструктив муносабатлар учун миннатдорлик билдирди. Мен АҚШ Вакиллар палатасининг бюджет ва солиқ қўмитаси раисиман. Биз Қўшма Штатлар ва сизнинг ажойиб мамлакатингиз ўртасидаги иқтисодий алоқаларни янада ривожлантириш учун янги йўлларни топишга интиламиз.
Абдумалик Сарманов таржимаси.
Ўхшаш янгиликлар
