Қозоғистон Президенти Елена Рибакинани дунёнинг энг пешқадам ракеткаси унвонини қўлга киритгани билан табриклади. Теннисчи фаолиятида
илк бор WTA рейтингида биринчи ўринни эгаллади. Қосим-Жўмарт
Тўқаев бу ютуқни «Қозоғистон спорти учун тарихий воқеа», деб атади, теннисчининг спортни ривожлантиришга, оммалаштиришга
қўшган ҳиссасини, ноёб истеъдоди, меҳнатсеварлиги ва ўзига бўлган ишончини
алоҳида таъкидлади. Қосим-Жўмарт Тўқаев Елена
Рибакинага чемпионлик руҳини сақлаб қолиш ва янги ютуқларга ишонч билан
интилишни тилади.
Қосим-Жўмарт Тўқаев, Қозоғистон Республикаси Президенти:
- Ушбу тарихий
ютуғингиз билан Қозоғистон спортини улуғладингиз ва номингизни жаҳон тенниси
солномасига муҳрладингиз. Сиз босган йўл минглаб ёш спортчилари ва
сайёрамизнинг барча бурчакларидаги миллионлаб теннис ихлосмандлари учун
илҳомлантирувчи намуна бўла олади. Кортларда ҳам, жамоат
жойларида ҳам юксак маданият намойиш этишингизни таъкидламасдан ўтолмайман, бу сизнинг ақл-заковатингиз ва тарбиянгизни акс эттиради.
Елена Рибакина АҚШ очиқ
чемпионатининг ярим финалига чиққач, юқори унвонни
нақд қилди. Чорак финалда у хитойлик Чжен Синвенни мағлуб этди.
Айнан шу ғалабадан сўнг, рақиблари қандай муваффақиятга эришишидан қатъи назар, ўзи учун у тарихий натижани кафолатлади. Эслатамиз, рейтинг 14
сентябрь куни расман янгиланади. Елена Рибакина якка баҳсларида жаҳон
рейтингида биринчи ўринни эгаллаган илк қозоғистонлик
теннисчи бўлди.
Елена Рибакина, теннисчи:
- Бу тарихий лаҳза ва мен
Қозоғистон вакили эканимдан жуда фахрланаман. Ҳар сафар мамлакатга қайтганимда,
қайси шаҳарга боришимдан қатъи назар, теннис билан шуғулланаётган жуда кўп
болаларни кўраман. Кортларга
тобора ақл
бовар қилмас даражада кўп
бола келяпти. Ёшларнинг тенглашишга интилишини кўриш
ёқимли. Бу ўзингизга ишонсангиз ва астойдил меҳнат қилсангиз, ҳамма нарсага эришиш мумкинлигини исботлайди.
Абдумалик Сарманов таржимаси
Ўхшаш янгиликлар
