Марказий Осиёдаги сунъий интеллект стартаплари жаҳон бозорига чиқиши учун фақат технологик ривожланиш кифоя қилмайди. Инвесторлар ва йирик компаниялар пилот лойиҳалар натижаларини, иқтисодий самарани баҳолайди. Бу масала Астана шаҳрида бўлиб ўтган «AI & Digital Bridge» форумида муҳокама қилинди. Иштирокчилар Қозоғистон минтақавий лойиҳаларни глобал бозорларга боғлагани, муҳим платформа вазифасини бажарганини таъкидлади. Мамлакатда стартап экотизими равнақ топмоқда, халқаро акселераторлар билан ҳамкорлик Марказий Осиё технологик компанияларига хорижий инвесторлар, буюртмачилар ва тажрибадан фойдаланиш учун замин яратади. Дастурларда юздан зиёд стартап иштирок этди. Улар орасида Америка бозорида ўз лойиҳаларини ривожлантираётган Қозоғистоннинг «Cybernet AI» ва «Armeta» компаниялари ҳам бор. «Cybernet AI» ўз маҳсулотини Мексикада синовдан ўтказишга улгурди. Бизнес ва колл-марказларни автоматлаштиришда сунъий интеллект самарадорлиги мижознинг жамоасидан 20 фоиз юқорилиги, 5 марта кам харажат талаб қилиши аниқланди. Яна бир Қозоғистон лойиҳаси - «Armeta» Хьюстондаги халқаро танловда ғалаба қозонгач, «Mitsubishi Power» билан ҳамкорлик қила бошлади. Американинг «Alchemist Accelerator» дастурига аъзо бўлди. Мутахассислар таъкидлашича, бу дастурлар минтақа стартаплари хорижий ҳамкорлар ва инвесторларни топиши, халқаро бозорга чиқишига ёрдам беради.
Иэн Бергман, Alchemist Accelerator бош директори:
- «Alchemist»да Марказий Осиёнинг кўплаб стартаплари иштирок этган. Улардан баъзилари бугун шу ерда. Минтақадаги муҳандислар жамоасини сақлаб қолган ҳолда Сан-Францискода бизнесини ривожлантираётган компаниялар бор. Бошқалари шу ерда жойлашган бўлса-да, глобал бозорда ишлаяпти. Бу Марказий Осиё беназир истеъдодлар манбаи эканлигидан далолат беради. Минтақага қизиқиш тобора ортиб боряпти. Биз ҳар йили бутун дунёдан келган минглаб аризаларни қабул қиламиз, Марказий Осиё стартаплари кўпроқ мурожаат қилишини истардик.
Асет Абдуалиев, «Silkroad Innovation Hub» асосчиси ва бош директори:
- Бизда катта сессия бўлиб ўтди, унда «Alchemist», «StartX», «Draper University» каби етакчи акселераторлар вакиллари қатнашди. Фаундерларимиз ушбу акселераторлар орқали халқаро бозорга чиқиш учун ноёб имкониятга эга бўлади. Дастур «Silkroad innovation hub»да Ўзбекистондаги асосий IT Парк ва бошқа ҳамкорлар кўмагида амалга ошириляпти. Биз ҳар йили минтақамиздаги муаллифларни Кремний водийсига олиб келамиз, уларнинг Америка бозорига киришига ёрдам берамиз. Дастур уч йилдан буён мавжуд. Дастурларда 100 дан ортиқ стартап иштирок этди, уларнинг кўпчилиги Америка бозорига фаол кириб боряпти.
Абдумалик Сарманов таржимаси.
Ўхшаш янгиликлар
