Рақамлаштириш – Қозоғистонга инвестициялар жалб қилишнинг янги йўналиши. Илгари хорижий капитал
асосан нефть ва тоғ-кон саноатига қизиққан бўлса, энди инвесторлар технологик лойиҳаларни тобора фаол кўриб чиқмоқда. Уларнинг асосийларидан бири –
«Маълумот марказлари водийси», у ҳисоблаш
қувватларини жойлаштириш ва сунъий интеллектни ривожлантириш учун асос бўлади. Лойиҳага йирик
халқаро технологик компаниялар жалб қилинган. Тегишли вазирлик таъкидлашича, бундай ташаббуслар мамлакатга капитал билан бирга илғор
технологиялар ва янги компетенциялардан фойдаланиш имкониятини беради. Ҳукумат
томонидан тасдиқланган, 2029 йилгача мўлжалланган
«Digital Qazaqstan» кенг кўламли рақамлаштириш умуммиллий
стратегиясини амалга ошириш бўйича фаолият режаси ушбу салоҳиятни очиб беради. Ҳукумат тасдиқлагач, у Астанада тақдим этилди. Ҳужжат фуқаролар, бизнес ва давлат аппарати учун
рақамли ечимларни қамраб олади.
Бахтияр Мухаметқалиев, Қозоғистон
Республикаси Сунъий интеллект ва
рақамли тараққиёт вазири ўринбосари:
- Қозоғистон еГОВ платформаси бўйича илғор ўнликка кирган. БМТ рейтинги
бўйича эса илғор 24 ликда. Тегишлича, бу янги инвестициялар олиб келади. Биз «Маълумот
марказлари водийси» ҳақида гапирганда шуни кўзда тутамиз. Президент
Экибастуз шаҳрида катта лойиҳани ишга туширди, Компаниялари билан у ерда ишлаш
ҳақида шартнома имзоланди. Натижада, биринчидан, иқтисодий ўсишга ёрдам беради,
сармоя олиб келади. Иккинчиси - янги технологияларга йўл очади. Ҳамма мамлакат
ҳам бу чипларни сотиб олиш, ўрнатиш имкониятига эга эмас. Учинчи ютуқ – малака
ошиши.
Ростислав Коняшкин, Қозоғистон Республикаси Сунъий интеллект ва рақамли тараққиёт вазирининг биринчи ўринбосари:
- Биз давлат хизматларида сунъий идрокни жорий этиш ва уларни рақамлаштириш устида фаол ишлаяпмиз, бу эса аҳолига хизмат кўрсатиш марказларига бўлган мурожаатлар сонини сезиларли даражада камайтириш имконини берди. Жорий
йилнинг биринчи ярмини ўтган йилнинг биринчи ярим йиллиги билан солиштирсак, бундай мурожаатлар сони 30 фоизга камайди. Фуқаролар
учун энг зарур
бўлган хизматларнинг 79-80
фоизини ташкил этувчи 10 та давлат хизматлари устида фаол ишлаганимиз туфайли бунга эришилди.
Давлат хизматлари ва
ижтимоий қўллаб-қувватлаш чораларини кўрсатиш муддатини икки марта қисқартириш,
иқтисодни рақамлаштириш, IT-хизматлари ва ечимлар экспортини 50 фоизга ошириш мақсад қилинган. Таълимга алоҳида эътибор қаратилган. 2029 йилгача мактаб, коллеж ва
олий ўқув юртлари битирувчиларининг камида 80 фоизи сунъий интеллект билан
ишлаш кўникмаларини эгаллаб олади. Шу билан бирга,
ечимларнинг бир қисми амалиётда қўлланиляпти.
Абдумалик Сарманов таржимаси.
Ўхшаш янгиликлар
