Асем Тәжиева: Игі істер қозғаушысы

Жеке бастан өткен оқиға жүйелі өзгерістердің бастамасына айнала ала ма?

«Орталық Азия әйелдерінің жетістік хикаялары» жобасының бұл шығарылымы — инклюзия саласындағы сарапшы, Ozim Platform әлеуметтік жобасының негізін қалаушы Асем Тәжиеваның өмірі мен кәсіби жолына арналған. Асемнің кәсіби жолы ана ретіндегі жеке тәжірибесінен басталды. Қызының даму ерекшеліктерімен бетпе-бет келген ол жауап іздеп, ғылыми зерттеулерді зерделеп, өз отбасына ғана емес, басқа да ата-аналарға көмектесетін тиімді құралдарды іздей бастады. Осылайша Ozim Platform идеясы дүниеге келді — ерекше білім беру қажеттіліктері бар балаларды тәрбиелеп отырған отбасыларға арналған цифрлық платформа. Уақыт өте келе бұл бастама ауқымды экожүйеге айналды: цифрлық платформадан бастап халықаралық мойындауға, инклюзивті білім беруді дамытуға, педагогтерді даярлауға және инклюзивті білім беруді зерттеу орталығын құруға дейінгі жолдан өтті. Бүгінде Асем Қазақстан мен Орталық Азиядағы балаларға, ата-аналарға және педагогтерге білім, зерттеу нәтижелері мен заманауи технологиялардың қолжетімді болуына үлес қосып келеді. Фильмде оның кәсіби жолы мен жобасының маңызы туралы Дина Сайфутдинова, Раушан Ибрашева және Асем Тәжиева ой бөліседі. Бұл — жеке жауапкершілік, ғылыми көзқарас, табандылық және ұзақ мерзімді өзгерістер жасауға деген ұмтылыс туралы хикая. «Егер біз ең болмаса бір адамның өміріне әсер етсек — меніңше, жобаның нағыз жетістігі де, нәтижесі де осы».

Веб-редактор: Berekekyzy Aiym