Вице-президент Ерлан Қарин ички сиёсат масалалари бўйича республика йиғилиши ўтказди. Унда Президент Администрацияси, Ҳукумат ва минтақалар вакиллари иштирок этди. Вице-президент ўз нутқида мафкуравий кун тартибини шакллантирувчи конституциявий қадриятларга батафсил тўхталди. Ерлан Қарин улар тарғиб қилиниши ҳамда жамиятда илдиз отиши зарурлигини таъкидлади. Унинг сўзларига кўра, Давлат раҳбарининг сиёсати Қозоғистоннинг янада тараққий этишини таъминлашга қаратилган. Модернизация бугунги кунда жамият ҳаётининг барча соҳаларини қамраб олмоқда. Шунинг учун жамиятда меҳнатсеварлик, таълим, илм-фан ва тараққиёт қадриятларини шакллантириш жуда муҳим.
Ерлан Қарин, Қозоғистон Республикаси Вице-Президенти:
- Конституциямиз нафақат давлатнинг ҳуқуқий асосини, балки жамиятнинг қадриятларини, пойдеворини белгилаб беради. Эҳтимол, тарихимизда биринчи марта мамлакат мафкураси аниқ тузилмага, мазмунга эга бўлди. Конституциявий қадриятларни тушунтириш ҳамда тарғиб қилиш бизнинг биринчи галдаги вазифамиз.
Ерлан Қарин фуқаролар билан фикр алмашишга алоҳида эътибор қаратди. Марказий давлат органлари ва минтақаларнинг алоқа марказларини ягона рақамли платформа доирасида бирлаштириш зарур. Бу рақамлаштириш ва сунъий интеллектга таянадиган янги иқтисодиёт учун давлат бошқаруви моделини такомиллаштириш йўналишларидан биридир. Қосим-Жўмарт Тўқаев ислоҳотнинг мажмуавий режасини ишлаб чиқишни топширди. Вице-президент Давлат раҳбари ташаббусларини рўёбга чиқаришни ички сиёсатнинг устувор йўналишларидан бири деб атади.
Ерлан Қарин, Қозоғистон Республикаси Вице-Президенти:
- Давлат раҳбари Қосим-Жўмарт Кемелевич Тўқаев анъанавий тарзда халққа Мактуб йўллади. Бу галги ҳужжат стратегик аҳамиятга эга. Унда мамлакатнинг турли соҳаларини ривожлантиришнинг узоқ ва ўрта муддатли йўналишлари белгилаб берилган. Аҳоли эҳтиёжи ҳам, давлат манфаати ҳам ҳисобга олинган.
Абдумалик Сарманов таржимаси.
Ўхшаш янгиликлар
