Қозоғистон Ватикан билан биргаликда оғир ва тузалмас касалликларга чалинган болалар ҳуқуқларини ҳимоя қилишга қаратилган қўшма ҳужжат тайёрлайди. Хартия лойиҳаси Астанада бўлиб ўтган иккинчи қўшма коллоквиумда муҳокама қилинди. Унинг очилишида вице-президент Ерлан Қарин ва Муқаддас тахтнинг Динлараро мулоқот бўйича дикастерияси префекти, кардинал Жорж Жейкоб Кувакад иштирок этди. Ерлан Қарин айтганидек, динлараро мулоқот аниқ гуманитар ташаббусларга айланиши лозим. Оғир касалликка чалинган болалар ҳаёти, соғлиғи ва қадр-қимматини ҳимоя қилиш эса муҳим йўналишлардан бири. Хартияни ишлаб чиқишда Ватиканнинг «Бамбино Жезу» госпитали ҳам иштирок этади. Ушбу шифохона Қозоғистондаги «University Medical Center» билан ҳамкорлик ўрнатган. Аввалроқ Ерлан Қарин кардинал Жорж Кувакад билан учрашиб, Съезд доирасида ҳамкорлик ва қўшма гуманитар лойиҳаларни муҳокама қилган эди. Кардинал Давлат раҳбари Қосим-Жўмарт Тўқаевга Рим Папаси Лео Ўн тўртинчи саломини етказди.
Абдумалик Сарманов таржимаси.
Ўхшаш янгиликлар
