Айгүл Мүкей: Өз тағдырының авторы

«Өз тағдырының сценарисі» — Айгүл Мүкей туралы деректі фильм

Телевидение — жай ғана мамандық емес. Кейбір адамдар үшін ол өмірлік мұратқа айналады.

Бұл деректі фильм Қазақстанға танымал тележүргізуші, журналист әрі ұстаз Айгүл Мүкейдің өмірі мен кәсіби жолына арналған. Целиноградтағы шағын теміржол станциясында басталған балалық арман оны телевидение, кино, журналистика және білім беру салаларына алып келді.

Айгүл Мүкей адам өз тағдырын көбіне өзі қалыптастырады деп санайды. Оның өмір жолына күтпеген бұрылыстар, маңызды кездесулер, батыл шешімдер мен жаңа рөлдер әсер етті. Режиссер Талғат Теменов, журналист Жайна Сламбек және қоғам қайраткері Назгүл Мақжан оның тұлғасы мен кәсіби жолы туралы өз ойларын ортаға салады.

Фильмде телевидениенің дамуы, журналистиканың жаңа дәуірі, әлеуметтік жауапкершілік, ұстаздық, әйел өмірі, ана болу, бала тәрбиесі және уақыттың қадірі сөз болады.

Басты кейіпкер үшін журналистика — адамдарды тыңдауға, заманның тынысын түсінуге және қоғам үшін маңызды мәселелерге бейжай қарамауға мүмкіндік беретін мамандық. Ал өміріндегі ең маңызды рөл — ана болу.

«Өз тағдырының сценарисі» — өз жолын өзі таңдаған, өмірінің әр кезеңінен сабақ алған және жаңа сынақтарды қабылдаудан ешқашан қорықпаған әйелдің портреті.

«Мен өз жолыммен келе жатырмын. Ештеңеден қорықпаймын, ештеңеге алаңдамаймын. Жай ғана өз ісімді жасап келемін».

Веб-редактор: Арайлым Серқанова