Астанада сарапшылар алғашқы Құрылтай сайлауы қорытындыларын талқылады

Астанада Қазақстанның стратегиялық зерттеулер институтының «Сайлау 2026» платформасында отандық және шетелдік саясаттанушылар, талдаушылар мен қоғамдық байқаушылар сайлау науқанының қорытындыларын талқылады. Басты назарда жаңа Конституция ережелерін іске асыру. Сарапшылардың айтуынша, сайлау науқанының аяқталуы саяси реформалардың жаңа кезеңіне жол ашады. Мәселен, Құрылтайдың түпкілікті құрамы анықталғаннан кейін оның басшылығы мен комитеттерін қалыптастыру қажет. Кездесуге қатысушылар сондай-ақ жаңа парламенттік модель заң сапасына және депутаттар арасындағы жауапкершілікті үйлестіруге қалай әсер ететінін талқылады. Қазақстанның стратегиялық зерттеулер институты өткен саяси науқанның басты сипаты оның жоғары бәсекелестігі дейді. Сонымен қатар, сарапшылардың айтуынша, сайлауалды белсенділік қазақстандық қоғамның Президент Қасым-Жомарт Тоқаевтың саяси бағытына қолдаудың жоғары деңгейін көрсетеді.

Жандос Шаймарданов, Қазақстан стратегиялық зерттеулер институтының директоры:

- Сайлаушылардың 74%-ы дауыс беруге барған. Яғни, біздің сайлаушылардың төрттен үші өздерінің азаматтық белсенділігін танытып, өз таңдауын жасады. Біз өткен науқандағы саяси бәсекелестіктің өскеніне куә болдық. Тұтастай алғанда, барлық сарапшылар қоғамдастығы өткен электоралдық науқан өте белсенді, өте бәсекелі болды деген пікірде.

Америкалық сарапшы Кен Мориясудың айтуынша, саяси өзгерістердің ел үшін маңызы зор. Ең алдымен, олар мемлекеттің тиімді әрі жүйелі жұмыс істеуіне ықпал етуі керек. Сонымен қатар Hudson Institute-нің  аға қызметкері Қазақстанда орын алып жатқан түбегейлі өзгерістерге шетелде, соның ішінде АҚШ-та да үлкен қызығушылық бар екенін атап өтті.

Кен Мориясу, Hudson Institute аға қызметкері:

– Вашингтонда, жалпы АҚШ-та Қазақстанға деген қызығушылық өте жоғары. Себебі, Америкада алпауыт мемлекеттер арасындағы бәсекелестік жағдайында Орталық Азияның маңызы артып келе жатқаны жөнінде ортақ пікір қалыптасқан. Сондықтан Қазақстанның тұрақты саяси жүйе құруға бағытталған қадамдары АҚШ үшін үлкен қызығушылық тудырады. 

Веб-редактор: Нұрбек Балгүл Қайрошқызы