NVIDIA компаниясининг ҳаммуассиси ва раҳбари Қозоғистонни сунъий интеллект асбоб ускуналари жаҳон марказига айлантиришни таклиф қилди. Давлат раҳбари Қосим-Жўмарт Тўқаев Ақўрдада Женсен Хуангни қабул қилди. Қозоғистон Президенти сунъий идрок ва рақамлаштириш ривожини миллий устувор вазифа деб атади, 2026 йил мамлакатда «Рақамлаштириш ҳамда сунъий интеллект йили», деб эълон қилинганини эслатди. Қосим-Жўмарт Тўқаев NVIDIA президенти ташрифининг икки томонлама ҳамкорликни мустаҳкамлашдаги аҳамиятини таъкидлади, унинг глобал экотизимнинг кўзга кўринган иштирокчисига айланган биринчи Қозоғистон технологик яккашохи – Higgsfield билан ҳамкорлигини олқишлади.
Қосим-Жўмарт Тўқаев, Қозоғистон Республикаси Президенти:
– Бу ташриф NVIDIA билан алоқаларга жиддий туртки беради, бу биз учун катта аҳамиятга эга. Ҳамкорлигимизни мустаҳкамлашга қўшган ҳиссангиз ва Қозоғистон учун қилган меҳнатингиз учун шахсан миннатдорчилик билдираман.
Ўз навбатида, NVIDIA раҳбари Президент томонидан янги саноат инқилоби дебочасида қўйилган Қозоғистонни сунъий идрокни ривожлантириш ва кенг жорий этишга йўналтирилган давлатга айлантириш стратегик мақсадини юқори баҳолади. Женсен Хуанг мамлакатимиз билан ҳамкорлик салмоқли натижалар берганини қайд этди. NVIDIA Қозоғистон компаниялари, шу жумладан, Firebird AI KZ ҳамда Kazakhtelecom билан ҳамкорликни ривожлантирмоқда. «Бу йўлнинг бошланиши», дея таъкидлади Женсен Хуанг.
Женсен Хуанг, NVIDIA компанияси президенти:
– Сунъий интеллектни ривожлантириш учун, аввало, энергия, шунингдек, фан, математика ва технология соҳасида билимга эга бўлган инсонлар зарур. Қозоғистон ушбу йўналишларнинг ҳар бирини ривожлантириш учун катта салоҳиятга эга.
Қабул якунида Қосим-Жўмарт Тўқаев Қозоғистон сунъий идрок экотизимини ривожлантиришга қўшган ҳиссаси учун Женсен Хуангни I даражали "Дўстиқ" ордени билан тақдирлади.
Абдумалик Сарманов таржимаси
Ўхшаш янгиликлар
