Жаһандық таланттардың бәсекеге қабілеттілігі индексі бойынша Қазақстанның көрсеткіштері жақсарды

Қазақстан талантты жастардың бәсекеге қабілетін бағалайтын жаһандық GTCI индексінде бір жылда 39 сатыға көтерілді. Кәсіптік және техникалық дағдылар бойынша еліміз 122-орыннан 83-орынға шыққан. Бұған еліміздің колледж зертханалары мен шеберханаларын заманауи құрал-жабдықтармен қамтамасыз етуі, дуальді оқыту жүйесі, техникалық мамандықтар бойынша білім гранттары санының артуы ықпал еткен. Сондай-ақ аталған тың көрсеткішке Қазақстанның WorldSkills қозғалысына белсенді қатысуы және жұмысшы мамандардың дайындық деңгейін әлемдік стандарттарға бейімдеуі оң әсерін тигізген. Бұл еліміздегі – еңбек нарығында кәсіби біліммен қатар, коммуникация, сыни ойлау, жаңа жағдайға бейімделу және цифрлық сауат сынды әмбебап дағдылардың маңызы артып келе жатқанын көрсетеді.

Жұлдыз Сүлейменова, ҚР Оқу-ағарту министрі:

- Әлемдегі технологиялық өзгерістер де мамандықтар құрылымына әсер етуде. 200-ден астам жаңа мамандық пайда болады, 100-ге жуық мамандық трансформацияланады, 125 мамандық бойынша сұраныс төмендейді. Осы үрдістер техникалық-кәсіптік білім беру жүйесін еңбек нарығындағы және технологиялық өзгерістерге алдын ала бейімдеуді талап етеді.

Веб-редактор: Нұрбек Балгүл Қайрошқызы