Қазақстан Президенті Дүниежүзілік кеден ұйымының бас хатшысымен кездесті

Қазақстан кеден рәсімдерін оңтайландыру үшін цифрлық шешімдер кеңінен қолданылатын «ақылды шекара» моделін дәйекті түрде дамытып келеді. Бұл туралы Мемлекет басшысы Қасым-Жомарт Тоқаев Ақордада Дүниежүзілік кеден ұйымының Бас хатшысы Иэн Сондерспен кездесуде айтты. Президент Қазақстан Еуразиядағы көлік қатынасын нығайтуға және жүк тасымалына қолайлы жағдай жасауға көп күш-жігер жұмсап жатқанын айтты. Өз кезегінде Иэн Сондерс еліміз кедендік әкімшілендіру ісін жетілдіруде және заманауи цифрлық шешімдерді енгізуде елеулі табысқа жеткеніне тоқталды. Бұдан бөлек, тараптар әлемдік саудадағы сын-қатерлер мен үдерістер жайында пікір алмасып, сауда-экономикалық байланыстарды кеңейту және Орталық Азия өңірінің көлік-логистика әлеуетін арттыру перспективасына айрықша назар аударды. Кездесу соңында Қасым-Жомарт Тоқаев серіктестік пен достық байланыстарды нығайтуға қосқан үлесі үшін Иэн Сондерсті II дәрежелі «Достық» орденімен марапаттады.

Веб-редактор: Нұрбек Балгүл Қайрошқызы